Selenge.nutag.mn

“Улаанбаатар трам” төслийг хэрэгжүүлснээр агаарын бохирдол, байгаль орчинд үзүүлэх хорт хийн ялгарал эрс багасна

zulaa — Fri, 17 Apr 2026 16:49:13 +0800

Авто замын түгжрэлийг бууруулах, иргэдийн амьдралын чанарыг сайжруулах, нийтийн тээвэрт их багтаамжийн олон төрөлт хэрэгсэл нэвтрүүлэх ажлын хүрээнд “Улаанбаатар трам” төслийг хоёр чиглэлд хэрэгжүүлэхээр төлөвлөж буй.

Трамвай нь 100 хувь цахилгаан учир авто замын түгжрэл, автомашины хорт утаа ялгаруулалтаас үүсэх агаарын бохирдлыг бууруулах чухал ач холбогдолтой. Тухайлбал, нүүрстөрөгчийн дутуу исэл (CO₂) ялгаруулалт 39 мянган тонноор, азотын давхар исэл (NO₂) ялгаруулалт 234 тонноор, нарийн ширхэгт тоосонцор (PM2.5) ялгаруулалт 2.7 тонноор буурах боломжтойг ТЭЗҮ-д тусгасан байна. Мөн зорчих хугацааг хэмнэснээр жилд 49.6 сая ам.доллар, шатахууны хэрэглээ, ашиглалтын зардлыг бууруулснаар жилд 14.2 сая ам.долларын хэмнэлт гарах тооцоо гарсан аж.

Түүнчлэн төслийн талаарх олон нийтийн санал хүсэлтийг хүлээн авч, хэлэлцүүлэг өрнүүлсэн байна. Тус хэлэлцүүлэг, судалгаанд Баянгол, Хан-Уул, Сүхбаатар, Чингэлтэй дүүргийн нийт 38 хороодын иргэн оролцсон. Иргэдийн зүгээс төслийн хүрээнд ногоон байгууламжийг төлөвлөх, аюулгүй байдлыг хангах, иргэдэд замын хөдөлгөөний дарамт учруулахгүй байх тал дээр анхаарч ажиллах санал дэвшүүлжээ.

Сурах бичиг болон ЭЕШ-ын агуулгыг хянах ажлын хэсэг гаргана

zulaa — Wed, 15 Apr 2026 12:00:31 +0800

Арванхоёрдугаарангийн монгол хэл бичгийн шалгалтад Ц.Доржготов гуайн шог өгүүллэг орсон нь нэлээдгүй шүүмжлэлийг дагуулаад байгаа юм. Тэгвэл Боловсролын яамнаас сурах бичиг болон ЭЕШ-ын агуулгыг хянах ажлын хэсэг гарган ажиллуулахаар болжээ.

Боловсролын сайд Л.Энх-Амгалан:

-Сурах бичгийн агуулгын хянах ажлын хэсэг гарган ажиллуулна. Хаврын элсэлтийн ерөнхий шалгалтын агуулгыг сайжруулах зайлшгүй шаардлагабайна. Монгол хүүхдийн уншаад ойлгох чадварыг нэмэгдүүлэхгүй бол ирээдүйд олон асуудлын шалтгаан болно. Эх хэлээрээ уншаад ойлгохгүй байна гэдэг маш том асуудал. Үүнд анхаарч ажиллана гэв.

Малын хачиг нь 3 дугаар сарын сүүлчээс идэвхждэг

zulaa — Wed, 08 Apr 2026 15:34:12 +0800

Манай улсад хачгаар дамждаг 3 төрлийн халдвар бүртгэгддэг. Халдвар агуулсан малын хачигт хазуулахад хачигт риккетсиоз гэдэг нянгаар үүсгэгддэг өвчин, халдвар агуулсан ойн хачигт хазуулахад хачигт боррелиоз гэдэг нянгаар үүсгэгддэг өвчин, хачигт энцефалит гэдэг вирусээр үүсгэгддэг өвчин тусна.

Ямар төрлийн амьтад өвчилж, хүнд халдвар дамждаг вэ?

Мал ба зэрлэг амьтдын дунд хачгаар халдвар тархаж, байгаль дээр голомт үүсгэдэг. Мал, амьтдад халдварын шинж тэмдэг бүдэг илэрдэг. Халдвартай мал, амьтны цус сорсон хачиг халдвар дамжуулдаг. Ойн хачгаар дамждаг халдвараар өвчилсөн үхэр, ямааны түүхий сүү, цусыг уухад хүнд халдвар дамждаг.

Хачгаар дамжих халдваруудаар хэн өвчилдөг вэ?

Хачигт риккетсиоз
Манай улсын бүх аймаг, хот суурин газрын иргэд өвчилдөг. Бүх насныхан өвчлөх боловч 1-9 насны хүүхдүүдийн дунд илүүтэй тохиолддог.
Өвчлөгсөдийн 54,9 хувь эмэгтэйчүүд байдаг.
Нийт өвчлөгсөдийн 11 хувийг малчид эзэлдэг.

Малын хачиг нь 3 дугаар сарын сүүлчээс идэвхждэг тул жил бүрийн 4-5 дугаар сард өвчлөл хамгийн өндөр байдаг.

Хачгаар дамжих халдваруудын үед ямар шинж тэмдгүүд илэрдэг вэ?

Хачигт риккетсиоз
Ихэвчлэн толгойн үсэнд хачиг шигдэж, шарх үүсгэнэ.
Ойролцоох тунгалгийн булчирхай цочиж хөндүүрлэнэ.
Хачиг шигдсэнээс хойш 3-7 хоногийн дараа халуурна.
Хэсэг газар эсвэл бүх биеэр арьсан дээр гөвдрүүт тууралт гарна.
Хачиг шигдсэн шарх анихгүй удна.
Толгой өвдөнө, нүд улайна.

Хачгаар дамжих халдвараас хэрхэн сэргийлэх вэ?

Ойд орох бол ханцуй, өмдний шуумагт хачиг үргээгч цацах
Хувцсанд хачиг орвол авч хаях ЭСВЭЛ 10 минут халуунаар үйлчлүүлэх
Биед шигдсэн хачгийг эмнэлэгт хандаж зөв авахуулах
Ямаа, үхрийн түүхий сүү, мах, цус, хэрэглэхгүй байх
Тод өнгийн хувцас өмсч, хачиг наалдсан бол авч хаях
Хаврын улиралд толгойн үсэнд хачиг орсон эсэхийг өдөр тутамд шалгах
Хачигт хазуулсан бол эмнэлэгт яаралтай хандах
Хачигт энцефалитын байгалийн голомтот ойн бүсэд амьдардаг, тогтмол зорчдог, ажил эрхэлдэг бол вакцин тариулах

Улсын арслан Б.Орхонбаяр нутгийнхаа аваргын нэрэмжит барилдаанд түрүүллээ

zulaa — Tue, 07 Apr 2026 15:07:48 +0800

Сэлэнгэ аймгийн Мандал сумын харьяат, Монгол Улсын аварга Гунаажавын Эрхэмбаярын нэрэмжит улс, аймаг, цэргийн цолтой 128 бөхийн барилдаанд тус аймгийн Цагааннуур сумын харьяат, улсын арслан Б.Орхонбаяр түрүүллээ.

Ховд аймгийн Зэрэг сумын харьяат, улсын заан Б.Бат-Өлзий үзүүрлэв. Харин их шөвөгт дархан аварга Н.Батсуурь, улсын заан Н.Жаргалбаяр нар шалгарав.

Дунд шөвөгт улсын харцага Э.Даш, улсын начин Б.Сосорбарам, аймгийн хурц бадрангуй арслан Э.Мөнхбаатар, аймгийн арслан Х.Наранбаяр нар үлдсэн.

Нэрэмжит барилдааныг тохилдуулан Г.Эрхэмбаяр аваргад МҮБХ болон аваргууд, Таван-Хан дэвжээний бөхчүүд, үе тэнгийн бөхчүүд, багш, шавь нар, ах дүү, найз нөхөд, нутгийн иргэд зэрэг хүмүүс хүндэтгэл үзүүллээ.

Эх сурвалж: МҮБХ

Гадаад улсын иргэдтэй бүлэглэн гэмт хэрэг үйлддэг байж болзошгүй этгээдүүдүүдийг шалгаж байна

zulaa — Wed, 01 Apr 2026 16:04:13 +0800

Гадаад улсын иргэдтэй бүлэглэн иргэдийн төлбөрийн картын цахим мэдээллийг олж, гэмт хэрэг үйлддэг бүлэг этгээдэд холбогдох хэргийг Кибер гэмт хэрэгтэй тэмцэх газарт шалгаж байна.

Тодруулбал, Ц нарын бүлэг этгээд нь арилжааны банкны ПОС төхөөрөмж ашиглан иргэд, аж ахуйн нэгж, байгууллагуудад хуурамч орлогын гүйлгээ хийж, их хэмжээний хохирол учруулсан байж болзошгүй байна.

Иймд иргэд, аж ахуйн нэгж, байгууллагууд та бүхэн хөрөнгө оруулалтын эх үүсвэр, үйл ажиллагааны бодит байдлыг сайтар нягталж, баталгаажуулсны үндсэн дээр хамтран ажиллах, “хөрөнгө оруулалт” нэрээр олон улсын банкны карт ашиглах санал ирсэн тохиолдолд онцгой анхаарал хандуулж шалгах, мөн хувийн болон банкны картын мэдээллээ бусдад дамжуулахгүй байхыг анхаарна уу.

Ерөнхийлөгчийг дөрвөн жилээр хоёр удаа сонгох уу?

zulaa — Wed, 01 Apr 2026 11:49:20 +0800

“Зургаан жил нэг удаа” гээд байсан чинь... Улстөр заримдаа их хоржоонтой, хөгийн юм...

2019 онд бид Үндсэн хуульдаа гар хүрч, Ерөнхийлөгчийг зургаан жилээр нэг удаа сонгоно гэж шийдсэн. Тэр үед гоё үгс их явж байлаа... “популизмаас сална”, “эрх мэдэл төвлөрөхгүй”, “дахин сонгогдох гэж улайрахгүй Ерөнхийлөгчтэй болно” гэх мэт. Өөрөөр хэлбэл, төрийн тэргүүн маань дараагийн сонгуулийн төлөө биш, улс орны төлөө ажиллах боломж бүрдэнэ гэсэн найдвар. Гэтэл өнөөдөр тэр найдвар маань өөрөө Үндсэн хууль зөрчсөн байж магадгүй гээд л яригдаж эхэллээ.

Үндсэн хуулийн цэц уг заалтыг зөрчилтэй гэж үзсэн нь улс төрийг хөдөлгөөнд оруулчихлаа. Одоогийн Ерөнхийлөгч У.Хүрэлсүх 2021 онд сонгогдсон. Хэрэв хуучин заалт хэвээр бол 2027 онд бууна, дахин нэр дэвшихгүй. Өөрөө ч тэгж хэлж байсан.

Гэхдээ боломж гарвал амлалт бол түй ч хамаа алга болж...

Сүүлийн үед “дөрвөн жилээр хоёр удаа” гэсэн хувилбар хааяа нэг цухалзаад байгаа. Хэрэв энэ хувилбар бодит болбол юу болох вэ?

Товчхондоо одоогийн Ерөнхийлөгч У.Хүрэлсүх дахин нэр дэвших зам нээгдэнэ. 2019 онд дахин сонгогдохгүй байя гэж өөрсдөө шийдсэн систем, 2026 он гэхэд “за жаахан бодоод үзье” гэдэг дээрээ ирчихэж... Дүрмээ өөрчилж тоглолтоо үргэлжлүүлэх гэж байна уу? “хааны суудал дулаахан юм чинь, дөрвөн жилээр хоёр удаа гэдэг нь титмээ удаан зүүх шинэ арга биш биз?” Иргэний сонгох, сонгогдох эрхийг хязгаарласан гэж үзэх онолын боломж бий. Хэрэв Цэц яг энэ өнцгөөс дүгнэсэн бол түүнийг шууд буруутгах аргагүй. Гэхдээ улс төр гэдэг “зөв эсэх”-ээр хэмжигдэхгүй. Яагаад яг сонгуулийн мөчлөг ойртож байгаа энэ үед вэ? Яагаад яг одоогийн Ерөнхийлөгчийн хугацаатай давхцаж энэ асуудал сөхөгдөв? Хэрэв үнэхээр “дөрвөн жилээр хоёр удаа” гэдэг хувилбар батлагдвал 2019 оны реформын гол утга үндсэндээ алга болох төдийгүй, тэр үед ердөө л өрсөлдөгчөө унагах гэсэн зорилгоор эцэг хуулинд гар хүрсэн таамаг үнэн болж таарлаа.

https://www.shuud.mn/a/561620

Шүүхийн цахимжилтыг орон нутагт эрчимжүүлнэ

zulaa — Tue, 31 Mar 2026 15:31:10 +0800

Шүүхийн ерөнхий зөвлөлийн даргын тушаалын дагуу Шүүхийн ерөнхий зөвлөлийн гишүүн Г.Даваадорж, Ч.Баянжаргал, Цахимжилтын төвийн дарга Т.Мөнхбаяр, ахлах инженер Б.Ангараг болон “Ай Си Ти Групп” ХК-ийн Дижитал шийдлийн газрын захирал Ч.Урандэлгэр, төслийн менежер У.Хүслэнзаяа нар орон нутагт томилолтоор ажиллав.

Томилолтоор Сэлэнгэ аймгийн Сайхан сум дахь Сум дундын анхан шатны шүүх, Орхон, Сэлэнгэ, Дархан-Уул аймаг дахь шүүхүүд, Сэлэнгэ аймгийн Мандал сум дахь сум дундын анхан шатны шүүхэд “Цахим шүүх 2.0” цөм системийн иргэний хэргийн туршин нэвтрүүлэлтэд хяналт тавьж, шүүхүүдийн тодруулга, саналыг хэлэлцэж, алдаа засварын мэдээллийг хүлээн авч, засварлах ажлыг зохион байгууллаа.

Цахимжилтын туршин нэвтрүүлэлтийн явцад шүүх бүр нэг шүүгчид 2-15 хэрэг, нэхэмжлэл хуваарилж, цахимжуулан ажилласан ба уулзалт, хэлэлцүүлгийн үед гарсан алдааг гүйцэтгэгч компанийн төслийн баг залруулан ажилласан байна. Томилолтоор ажилласан баг шүүхүүдээс гаргасан саналуудыг нэгтгэн үзэхэд шийдэл боловсруулж, хөгжүүлэлтэд тусгах 35, туршин нэвтрүүлэлтийн үйл ажиллагааны төлөвлөгөөнд тусгах 2 санал гарсан.

Харин нэг саналыг ШЕЗ-ийн хэргийн хөдөлгөөний удирдлага, статистикийн газарт, таван саналыг ШЕЗ-ийн цахим хөгжил, мэдээллийн технологийн удирдлагын газарт тус тус шилжүүлж, нэг саналыг хэрэг хянан шийдвэрлэх системийн ажлын хэсгээр шийдвэрлүүлэхээр тогтов. Түүнчлэн уулзалтын үед Шүүхийн ерөнхий зөвлөлийн гишүүд зөвлөлөөс баримталж буй бодлого чиглэлийг танилцуулж, санал хүсэлтийг сонсов.

Ж.Баярмаа: Нийслэлийн иргэд Туул гол дээгүүр зам тавиулахыг хүсэхгүй байна

zulaa — Thu, 26 Mar 2026 10:10:48 +0800

УИХ-ын гишүүн Ж.Баярмаа сэтгүүлчдийн асуултад хариулав.

Энэ үеэрээ тэрээр: "Аливаа үйл ажиллагаа тухайн нутаг дэвсгэрт амьдарч буй оршин суугчдын сэтгэлд нийцсэн байх ёстой. Гэтэл харамсалтай нь нийслэлийн иргэд өөрсдөө ийм хурдны зам барихыг хүсэхгүй байгаа бөгөөд үүний эсрэг жагсаал, цуглаан зохион байгуулж байна. Энэ нь маш том хүчин зүйл учраас зайлшгүй тооцож үзэх ёстой.

Аливаа зүйлийг хэрэгжүүлэхдээ, тэр дундаа төсвийг захиран зарцуулахдаа иргэдийн санал бодол, хүсэл сонирхолд тулгуурлах шаардлагатай. Үүнийг хууль, эрх зүйн хүрээнд ч тодорхой тусгах хэрэгтэй. Гэвч бодит байдал дээр нийслэлийн төсөв хэрхэн батлагдаж, ямар журмаар зарцуулагдаж байгаа нь тодорхой бус хэвээр байна. Төсөв хаагуур, хэрхэн, юунд зарцуулагдаж байгааг олон нийт бүрэн мэдэхгүй байгаа нь асуудал дагуулж байна.

Ийм их хэмжээний, наядаар хэмжигдэх өртөг бүхий томоохон төслүүд ямар үндэслэлээр батлагдаж, хэрэгжиж байна вэ гэсэн асуулт гарч ирж байна. Сүүлийн үед төсөвтэй холбоотой асуудлууд олноор яригдаж, аудит, хяналтыг сайжруулах шаардлагатайг олон хүн онцолж байна.

Мөн төсвийн хөрөнгөөр хэрэгжиж буй зам, гүүрийн ажлыг туршлагагүй, мэргэжлийн бус компаниуд гүйцэтгэж байна гэх мэдээлэл яригдаж байгаа нь худалдан авалтын үйл явц ил тод, шударга явагдаж байгаа эсэхэд эргэлзээ төрүүлж байна.

Ийм нөхцөлд уг төслийг хэрэгжүүлэх нь зөв үү, буруу юу, нийслэлийн иргэд үнэхээр дэмжиж байна уу гэдэг асуулт нээлттэй хэвээр байна. Түгжрэлийг 30 хувиар бууруулна гэж байгаа ч мэргэжлийн хүмүүсийн үзэж байгаагаар уг төсөлд тодорхой эрсдэл, дутагдал байж болзошгүй байна." гэлээ.

“Морин хуур“ болон “Монгол тэмээний өдөр”-өөр БҮХ НИЙТЭЭР АМРАХГҮЙ. Өв соёлоо тунхаглан хамгаалах зорилготой ТЭМДЭГЛЭЛТ ӨДӨР

zulaa — Wed, 11 Mar 2026 17:01:46 +0800

Н.Батсүмбэрэл тэргүүтэй найман гишүүн зургаадугаар сарын 07-ныг "Морин хуурын өдөр", нэгдүгээр сарын 24-нийг "Монгол тэмээний өдөр" болгох хууль боловсруулж байна.

Тодруулбал, уг өдрүүдийг тэмдэглэлт өдөр болгосноор БҮХ НИЙТЭЭР АМРАХГҮЙ бөгөөд энгийн тэмдэглэлт өдрийн тоонд оруулах юм байна.

Энэхүү санаачилга нь Монголын уламжлалт мал аж ахуй, үндэсний өв соёлын бэлгэ тэмдэг болсон тэмээний соёл, аж ахуйн үнэ цэнийг таниулахын зэрэгцээ Морин хуур хэмээх монголчуудын язгуур хөгжмийн зэмсэг, уртын дуу, ардын дуу, туульс, зан үйлтэй салшгүй холбоотой оюуны өвийг хамгаалах, түгээн дэлгэрүүлэх ач холбогдолтой юм.

Морин хуур нь 2008 онд ЮНЕСКО-гийн Хүн төрөлхтний соёлын биет бус өвийн жагсаалтад бүртгэгдсэн, монголчуудын түүх, соёл, оюуны өвийн бэлгэ тэмдэг учир тунхаглан хамгаалах нь чухал юм.

"Нийтээр тэмдэглэх тэмдэглэлт өдөр" гэж түүхэн болон тодорхой үйл явдал, түүхэн уламжлал, нийгмийн тодорхой давхаргыг хамарсан, бүх нийтээр тэмдэглэж заншсан өдрийг хэлдэг бөгөөд энэ нь бүх нийтээр амрах амралтын өдөр биш юм.

Тухайлбал, Үндсэн хуулийн өдөр 1-р сарын 13, Залуучуудын өдөр 8-р сарын 25, Оюуны өмчийг хамгаалах өдөр 4-р сарын 26 гэх мэт хуульд заасан тэмдэглэлт өдрүүд байдаг.

Монгол Улсын Үндсэн хуулийн Тавдугаар зүйлийн тав дахь хэсэгт “Мал сүрэг бол үндэсний баялаг мөн бөгөөд төрийн хамгаалалтад байна”, Долдугаар зүйлийн нэг дэх хэсэгт “Монголын ард түмний түүх, соёлын дурсгалт зүйл, шинжлэх ухаан, оюуны өв төрийн хамгаалалтад байна” гэж тус тус заасан.

Эдгээр заалт нь төрөөс үндэсний өв соёл, уламжлалт мал аж ахуй, тэдгээртэй салшгүй холбоотой соёлын үнэт зүйлсийг хамгаалах, хөгжүүлэх, түгээн дэлгэрүүлэх бодлогыг хэрэгжүүлэх эрхзүйн үндсийг бүрдүүлж байна.

Хуулийн төсөл батлагдсанаар дараах эерэг үр дагавар бий болно. Үүнд:

Монгол Улсын Үндсэн хуульд заасан үндэсний өв соёл, уламжлалт мал аж ахуй, оюуны өвийг хамгаалах төрийн үүрэг бодитоор хэрэгжихэд дэмжлэг үзүүлнэ.
Монгол тэмээ, морин хуур хөгжимтэй холбоотой уламжлалт мэдлэг, ур чадвар, зан үйл, бүтээлч үйлдвэрлэлийг дэмжих, түгээн дэлгэрүүлэх боломж нэмэгдэж, соёлын өвийн хадгалалт, өвлүүлэлт сайжирна.
Иргэдийн үндэсний бахархал, эх оронч үзэл, соёлын дархлаа бэхжиж, хүүхэд, залуучуудад үндэсний өв соёлоо танин мэдэх, хайрлан хамгаалах ухамсар төлөвшинө.
Соёлын аялал жуулчлалын бүтээгдэхүүн, үйлчилгээний нэр төрөл нэмэгдэж, дотоодын болон гадаадын жуулчдад зориулсан соёлын арга хэмжээ тогтмолжин, орон нутгийн эдийн засагт эерэг нөлөө үзүүлнэ.
Хуулийн төсөл нь улсын төсөвт шууд дарамт учруулахгүй бөгөөд холбогдох арга хэмжээг салбарын байгууллагуудын батлагдсан төсөв, төлөвлөгөөний хүрээнд хэрэгжүүлэх боломжтой.

Монгол ардын намын дарга Н.Учрал Сэлэнгэ аймгийн намын гишүүдтэй уулзлаа

zulaa — Fri, 06 Mar 2026 15:00:44 +0800

Монгол Ардын намын дарга, УИХ-ын дарга Н.Учрал төвийн бүсэд ажиллах томилолтынхоо эхэнд Засгийн газрын хамгийн анхны байр болох Сэлэнгэ аймгийн Алтанбулаг суман дахь Ардын түр Засгийн байрыг соёлын өвд бүртгэн, музейн чиглэлээр сэргээн засварлаж хадгалж хамгаалах үүргийг холбогдох албаныханд өгсөн. Үүний дараагаар Сэлэнгэ аймгийн намын гишүүд, дэмжигчидтэйгээ уулзсан юм.

Тэртээ 105 жилийн өмнө эх оронч залуусын гал цогтой зүрхнээс бадарсан хувьсгалын дөл Сэлэнгэ нутгаас Монгол орон даяар дүрэлзэн асч, Монголын шинэ түүхийн их эргэлтийг эхлүүлсэн түүхтэй. Монгол Ардын нам байгуулагдсаны 105 жилийн ой, “Эх орончдын өдөр”-ийн арга хэмжээг Сэлэнгийн долгио чуулгын уран бүтээлчид “Шивээ хиагт” дуугаар эхлүүлэв.

105 жилийн түүхтэй Монгол Ардын нам бол түүхэн гавьяатай бодлогын нам. Энэ ч утгаараа гишүүн төвтэй, ард түмнийхээ хүсэл зорилгыг мэдэрсэн шинэ цагийн салхийг авчрах шинэчлэлийн олон ажлыг хийж хэрэгжүүлэхээ намын дарга танилцууллаа. Мөн намынхаа бүх шатны дарга нарыг ард түмэнтэйгээ ойрхон байхыг захисан.

2025 онд ажил үйлсээрээ манлайлсан “Улсын тэргүүний намын анхан шатны байгууллага”-аар Сэлэнгэ аймгийн Орхон сумын намын хороог шалгаруулж, намынхаа төлөө насны залуугаа зориулсан ахмад гишүүддээ хүндэтгэл үзүүллээ. Мөн хамгийн олон жил намын анхан шатны байгууллагын дарга, дэд дарга, үүрийн даргаар ажилласан дарга нарт “Талархал” гардуулсан. Энэ үеэр мөн Монгол Ардын намд шинээр элссэн 23 хүнд намын батлахыг нь гардуулсан юм.

Энэхүү арга хэмжээнд Сэлэнгэ аймгийн Монгол Намын хорооны дарга, УИХ-ын гишүүн Ч.Ундрам, УИХ дахь Монгол Ардын намын бүлгийн дарга Ж.Батжаргал, Монгол Ардын намын Ерөнхий нарийн бичгийн даргын зөвлөх Т.Сайнжаргал, намын Нарийн бичгийн дарга С.Мөнгөнчимэг, Олон нийттэй харилцах, зохион байгуулалттай газрын дарга Ж.Дамдинцэрэн, Мөрийн хөтөлбөрийн хэрэгжилт, мониторингийн газрын дарга Б.Нандин-Эрдэнэ, Орон нутаг, намын хөгжлийн хэлтсийн дарга Б.Галсан нар оролцлоо.